MINANGGLOBAL.ID, HERITAGE & CULTURE – Sungguahpun datuak surang nan taimbau, tagak dek adaik jo pisako, dibarih cupak jo gantang, dek alua datuak-datuak kasasonyo, ambo ka mandatangkan sambah!
Adopun sambah nan akan dipasambahkan kapado datuak pado wakotu iko kini , kan dek sitantangan kami nan mananti, bak cando dandang nan sabilah, dek lah lamo tatap di kualo, rintang dek pasia tapi pantai. Dek lamo raso mananti, arok dek cameh badan diri, dalam dek bimbang nan ba itu, tapajam kilek di langik, badantuang guruah di lautan, manggaga bumi ka ulu, tarandam pasia di pantai, barabuik ombak di muaro, tasimbua riak buiah karang, tandonyo kapa nan lah datang, langkok jo juragan juru mudi, kini lah tibo di labuhan.
Kok ati ko lah nyato suko, nan bak paneh tasinga patang, batambah yakin di ati, badabua ombak di pintu, ma ampeh ka ruang tangah, ka tabiang amparan suto, di bawah payuang ubua-ubua, di baliak tirai langik-langik. Tapi samantang pun nan bak itu, hanyo saketek nan marusuah, barisan lancang kok tak baiak, duduak nakhodo kok tak nyaman, kok senjang mamandang taluak, nan taluak ikolah ruponyo. Dari jauah kami angkek tangan, sambah jo simpuah pamanuahi, sakian rundiang dari kami!
Cek video Pasambahan ini di Link YouTube: https://youtu.be/sTcor4AdRss
