MINANGGLOBAL.ID, HERITAGE & CULTURE – Jo salam sambah dianjuang, di susun jari nan sapuluah, sambah taserak ka nan rapek, salam ka bakeh nan basamo, ujuik mukasuik panyambahan pado wakotu iko kini, nan ba ibaraik kato adaik,
Kain taguah batapi kasa
Dibari bajambu anam
Panjang nan tangah tigopuluah
Lah panuah di tanah data
Talenggang ka luak agam
Taserak ka luak limopuluah
Dek adaik Katumangguangan sarato Parpatiah nan sabatang, nan tidak lakang dek paneh, nan tido lapuak dek ujan, tatadah ka dalam koto, talenggang ka dalam kampuang, iyolah kampuang nan baradaik.
Sungguah sarupo iko kini, nyatolah adaik nan bapakai, taranglah alua nan baturuik, duo aluran nan disinan, partamo syarak taujudullah, kaduo adaik tabatu intan. Nan kato adaik tabatu intan, duo aluran nan disinan, partamo duduak nan babanja, kaduo tagak nan babandiang.
Dengan paniliak pandang kami, nan diagak nan lah tibo, nan dicinto nan lah datang. Kok nan cincin galang lah buliah, nak ayia sungai lah tabik, nak buah batang marunduak, nak ulam pucuak manjulai, sananglah ati ibu bapak, sajuak anggoto ka tujuahnyo, dingin sumangek batang tubuah, sajuak bamandi di talago.
Tapi samantang pun nan bak itu, aluran ka diri badan datuak, duduak kok indak sabanjaran, tagak kok indak sabandingan, kok tidak tanang sajatar, ampun jo maaf ambo mintak. Sambah alah, salam talalu, bunyi diharap nak kumbali, sakian sajo panyambahan!
Cek video Pasambahan ini di Link YouTube: https://youtu.be/CyK_INQBDfk
