Masri M, Dt. Putiah (Pegiat Alua Pasambahan Minangkabau)

MINANGGLOBAL.ID, HERITAGE & CULTURE –  Sampai dek datuak! Sapanjang parundiangan dari datuak, dipencak sapinteh lalu, marateh budi nan salewai, tagamang-gamang batang tubuah, sulik mangganggam kato bana, dalam lurah rantiang mangaik, parik lah nyato bakuliliang, namun sapantun bintang tujuah, dikapuang bintang gumarau mamakai cahayo ilang timbua, sayang sapantun bulan panuah mamakai cahayo salamonyo, nyato talatak di nan tinggi. Tinggi ko tak rago dijuluak, buah lah jatuah sakandaknyo.

Di dalam adaik na bapakai lah nyato luruih babarisan, lah nyato baukua ba patutan, sulik dek kami ka maniru, baso basi tadahan budi, disiko baru basuo, asah sungguah, janji ba buek, ikara ba unyi ba tapati, sungguah manyanang dalam hati, bak api tarang dek kaco, putiah tiado ba ukuran, janiah kalua jo ka dalam.

Bayangan sambah nan mandatang, kan dek nan kato sambah lah tibo, limbago salam lah manimpo tibo di kami nan basamo. Limbak nan dari pado itu, nan bak papatah jo patitah andai di dalam adaik juo, kato nak tibo di walaknyo, rundiang nak tibo di jangkonyo, nak nyo salamaik samparono,

Bagantuang di tali taguah
Samo bakamba kaduonyo
Sungguah pun kami datuak suruah
Datuak nak samo sato pulo

Cek video Pasambahan ini di Link YouTube: https://youtu.be/YlIMWFWvcEo

LEAVE A REPLY

Please enter your comment!
Please enter your name here