Jawab Pasambahan Siriah Pinang Lanjutan 1 (Sipangka)

MINANGGLOBAL.ID, HEROTAGE & CULTURE, Sapanjang parundiangan dari datuak, di ambiak ujuang pangabisan, tangah jo pangka ko tak dapek. Makonyo siriah ka dikunyah, makonyo pinang ka digatok, siriah nak tantu gagang, pinang ko nak tantu tampuak, kan bana ba itu kato datuak?

Mandanga andai rundiang datuak, tasuo bak andai jo bidaran, papatah luak nan tigo gurindam caro di Minang.

Tanah data di luak agam
Tigo jo luak limopuluah
Alun taliek lah tapaham
Lah tantu bijo nan ka tumbuah

Pucuak si ali-ali linteh
Duo jo pucuak ali mudo
Di langik datuak nan malinteh
Ambo di baliak itu pulo

Sifatan ujan nan bapuhun, tumbuah lah paham dalam ghaib, ka saksi bana nan tujuah, adat bajalan sandirinyo, syarak ba makam pado dalia. Adaik badiri di nan patuik, tigo aliran nan tajali, partamo garak jo garik, pamenan tangan di nan rami, pancaliak tunggang di antaronyo. Kaduo baso jo basi, katigo siriah jo pinang.

Sambah manyambah dalam adaik, tali batali undang-undang, tasabuik di muluik manih, muluik manih talempong kato, baso baiak gulo di bibia, banamo adaik sopan santun.

Takalo maso dahulu, samusim maso sa isuak, indak do musim rang ka sawah, bukan dek taun rang ka ladang, dek lauik kanji-kanjian, dek bancah ka rawang-rawangan, tasabuik juo siriah pinang.

Siriah simaruik simarunggai, mulo di tanam rajo Aceh, bijo nan datang dari lauik, manjala ka bungo tanjuang, jangka mambaluik pudiang ameh, karakok samulo jadi, bajunjuang ka tunggak tuo, manjala ka tiang panjang, tiang panjang si majo lelo, kini lah jadi siriah udang, di ambiak sakambang lapeh cinto. Indak di ambiak tiok hari, bukan dikunyah satiok malam, hanyo dicari kutikonyo. Tumbuah sarupo iko iko kini, nyatolah adaik nan bapakai, taranglah alua nan baturuik, barulah siriah kito pagunokan.

Limbak nan dari pado itu, lorong kapado gambianyo, gambia kuniang silaro dadiah, buatan puti sarilomak, manihnyo tingga di lidah, kaleknyo tingga di rangkungan, sarinyo naiak ka muko, pariso ka ruang tubuah, daun malayok ka lautan, jatuah ka pulau batebaran.

Tasabuik pulo sadahnyo, sadah putiah mambanak balam, di basah jo ayia bungo, dipati jo pati santan, dikipeh jo ambai-ambai. Dipakai di jari manih, bakisa ka jari tunjuak, mambayang ka tapak tangan, sapalik sapuluah ameh, sagadam sakati limo, harago ndak ta haragoi, harago satimbang jo nagari, makanan anak rajo-rajo, makanan sutan jo pangulu. Limbak nan dari pado itu, lorong kapado tampang pinang, pinang biluluak nan batuntun, di tuntun si bidodori, tumbuah di medan pasogian, di ambiak Abang Salamat, Allah ta’ala kan yo sungguah, kiro-kiro duo jumaek, mangalakak mayang di cupu, ketek tidak, gadang pun bukan, bulek umpamo talua buruang, sadudu siriang jo pinang, talatak dalam carano,

Ramo-ramo tabang malayang
Malayang ka koto tangah
Banyak nan ampek puluah ampek
Indah carano bukan kapalang
Talatak di tangah-tangah
Di lingkuang urang nan rapek

Buruang si nurak jo si nuri
Manari ateh pambatang
Siriah galak, pinang manari
Maliek carano nan lah datang

Lorong kapado caranonyo, carano banja renowali, buatan tukang koto gadang, nan rimbun bungo kalikih, nan ranggah bungo kacubuang, nan kungkun gagak ka inggok, talantiak alang ka tabang. Satahun dipuga bugih, samusin dilangka cino, usah ka ratak rangeh tido, itu carano nan pulang pai dari ujuang sampai ka pangka, lah dibujua dilintangi, kandak adaik pinto pisoko, siriah sacabiak nak di kunyah, pinang sadidih nan bagatok,

Tanam siriah tanam silodang
Tanam karakok di halaman
Cabikak siriah gatoklah pinang
Ambiaklah rokok pamenan tangan

Lorong kapado tambakaunyo, tambakau ambun barajono, di racik sutan dari Dohum. Saeto panjang jaluanyo, nan ba ampai ka ruang tangah, bajamua ka biliak dalam, bapantang masiak dek paneh, masiak dek ambun tangah malam.

Itunyo sambah salam tajelo, tatabua sambah, tairik tabantang, kami harap datuak tarimo, sakian sajo panyambahan!

Cek video Pasambahan ini di Link YouTube: https://youtu.be/NHzszfuPDsw