MINANGGLOBAL.ID, HERITAGE & CULTURE, Sampai dek datuak! Sapanjang parundiangan dari datuak, nan bak patatah jo patitah, andai di dalam adaik juo.
Talatak puntiang di ulu
Di bawah kumpalan tali
Asa mulo kato dahulu
Tigo limbago nan tajali
Partamo, sambah manyambah, kaduo baso jo basi, katigo siriah jo pinang. Sambah manyambah dalam adaik, tali batali undang-undang, tasabuik di muluik manih, muluik manih talempong kato, baso baiak gulo di bibia, banamo adaik sopan santun.
Lah talayang siriah jo pinang, talatak dalam carano, langkok ba isi sacukuiknyo, bapaga jo arai pinang, balingka maniak bakarang, kuniang tacoreng di atehnyo. Singkoklah tutuik nan salampih, nak diliek dipandang nyato, nak bapakai adaik carano nan di tangah, kan bana baitu kato datuak?
Dek indak ka salah sasek tuak, salah kiak kok mancabiak, salah egang kok mamutuih. Sabab ba a lah dek baitu, lauik ko kan banyak nan sati, rantau ko banyak nan ba tuah. Takuik jo gonta ambo manyabuik, sabalum siriah ambo kunyah, sabalun pinang ambo gatok, siriah nak tantu gagang, pinang ko nak tantu tampuak, maklum datuak satantang itu!
Cek video Pasambahan ini di Link YouTube: https://youtu.be/I50ikE6rUdg
