MINANGGLOBAL.ID, HERITAGE & CULTURE, Sapanjang parundiangan dari datuak, lah data bak gurun di sapu, lah licin bak ditimpo minyak, kok nak aluih kilek lah tibo, kok nak licin cahayo lah datang, aluih bak labiah bak disapuah, licin bak labiah bak di jonang.
Nan bak talempong elok bunyi, bak gandang elok pangguguah, raso tadanga-danga juo, rundiang nan datang dari datuak, lamak manih kacaknyo sadang, lamak bak bagai pisang masak, manih bak santan jo tangguli, raso tangguli ayia tabu. Dalam nan bimbang nan bak itu, rundiang nan datang dari datuak, nan bak banang tarantang panjang, ujuangnyo tasangkuik ditaraju, kok ndak asah tali ka kumpalan elok dibaok ka paminta, ndak bak umpamo urang manembak, pandang lah asah ka sasaran, tembak lah tibo di alamat. Lah badatak patiak an tunam, takabuik api panggala, tembak bak raso tak ka mungkia. Tapi samantang kok bak itu,
Kok satinggi-tinggi malantiang,
Lah tibo di awang-awang, nan suruik ka tanah juo
Kok sa abih canggah jo rantiang
Dikubak kulik jo batang, toreh pangubo lah basuo
Nan kajadi ujuik parundiangan, siriah sacabiak nak bakunyah, pinang sadidih ndak bagatok, kan bana ba itu kato datuak?
Kalau lah gugua dari tampuak
Kalau lah sakah dari dahan
Kalau lah pintak dari datuak
Sifatan dek kami mamakaian.
Cek video Pasambahan ini di Link YouTube: https://youtu.be/KptNaxZNA4U
