Masri M, Dt. Putiah (Pegiat Alua Pasambahan Minangkabau)

MINANGGLOBAL.ID, HERITAGE & CULTURE –  Sampai dek Datuak! Sapanjang parundiangan dari datuak, lah bana barisan adaik, lah kewi cupak piawai, mandanga gurindam kato, badabua ombak sailan, anyuik sagalo pukek ikan, ba sasak buyiah di muaro, marapuang karang ka sadonyo, aguik lah sajo diri kami. Ka ka ilia sampan lah ratak, ka badayuang parahu lah pacah, intang dilamun agak-agak, jiko di turuik manuang badan ko, indak ciek nan ka jadi.

Tapi samantang kok bak itu, ka di ansua jo langkah senjang, untuang ta timba tabang datuak, golek ndak usah di nan data. Uraian kato dari datuak, umpamo ragi nan ba susun, kilek mamacah ka nan rami, sanang ka dalam lubuak hati. Tapi kok dek diri badan kami tuak, nan bak umpamo baban nan barek, ka di kiak barang bakucuang, disiko lah rumik badan diri, satantangan adaik jo limbago, pusako sajak dari dahulu, nan tak baransak di lingkuang sopan, tak baraliah di lingkuang budi, di Minangkabau tampek tumbuahnyo. Nan kato iyo lah bak itu, kok tarang lah tasingkok bulan, kok malam suluah palito, tak ragu baban di baok, hanyo sa baban sa pikulan.

Niat ko lai nak ka gunuang, nak maminum di talago janiah, sayang banyak batu nan tajam, tabiang tarah, baluka tuo, intang di lamun agak-agak, ontah pabilo ka nyatonyo. Caliak dek datuak batang batuang, ketek rabuang ba kucuang, lah gadang rueh mambaro, di buku kalupak inggok, walau ka tuo dek ba gayiang, cinto nak tinggi sajak dahulu. Sabab lah asah japuik anta, golek lah tibo di nan data, taduah lah nyato ba naungan, ko satantangan diri marapulai tuak, kok duduak kami baok baiyo, kok tagak kami baok ba tolan, alah ka sanang ati datuak.

Tapi samantang pun bak itu, satantangan dek anak kamanakan kami, kok tibo di korong kampuang datuak, salah nyo kok mungkin kok talampek, khilaf nyo mungkin kok tadorong, tunjuki pulo dek datuak ka nan elok, ajari pulo dek datuak ka nan bana, itu lo nan pintak pinto kami, pulang ma’alum pado datuak.

LEAVE A REPLY

Please enter your comment!
Please enter your name here