MINANGGLOBAL.ID, HERITAGE & CULTURE – Mano datuak! Disambah datuak! Adopun sambah nan ka dipasambahkan kapado datuak pada nan bak ibarat kato adaik, talatak puntiang di ulu di bawah kumpalan tali, asa mulo kato dahulu, tigo limbago nan tajali. Partamo sambah manyambah, kaduo baso jo basi, katigo siriah jo pinang. Sambah manyambah dalam adaik tali batali undang-undang, tasabuik di muluik manih, muluik manih talempong kato, baso bayiak gulo di bibia, banamo adaik sopan santun. Adaik di lauik bajuru mudi, adaik di sabuang bajuaro, adaik di alek ba sirajo jonang. Nan dikatokan si juru mudi, tau jo angin dan baseru, tau jo ombak nan basabuang, tau jo pasang turun naiak. Nan dikatokan si juaro, tau di tuah sisiak ayam, pandai managah manampin taruah, tau di bulang nan bakicuah. Nan dikatokan si rajo jonang, tau jo ereang dengan gendeang, tau di cakak dengan kaik, pandai manjago labiah kurang, tapi samantang pun bak itu,
Atai-atai si bungo atai
Lah kambang bungo sitawa
Tacaca jangguik ka lanatai
Nan manusia ko basipaik gawa
Kok kunun lah jonang rang ketek mudo matah, umua alun sataun jaguang, darah alun satampuak pinang, satantangan edangan juadah ko, kok basuo kilaf-kilafat, kok luak luak sapadi, kok sumbiang sumbiang sabareh, kok lumpang sibiran manaraco. Artinyo bana, satantangan edangan juadahko, kok kurang nan ka ditukuak, kok lumpang ka disisik, balabiah nan indak ka di ambiak. Singkeknyo kato sado itu, pulang ma’alum pado datuak, sambah alah, salam talalu, bunyi diharap nak kumbali, sakian sajo panyombahan.
Cek video Pasambahan ini di Link YouTube: https://youtu.be/Xb4CJMdNuzw
