MINANGGLOBAL.ID, HERITAGE & CULTURE – Sapanjang parundiangan dari datuak, curahan rundiang nan tibo, uraian kato nan mandatang. Nan bak tungkek batatah intan, balilik sapuah ameh urai, raso ka kokoh pamacik an. Ditiliak langgaman adaik, diukua cupak jo gantang, cupak boyan gantang piawai, bungka ganok taraju bayang, naraco ukuran adia. Buleknyo kato nan lah tibo, rundiangan bayiak nan didanga, imbauan di dalam budi aluih. Diagak rundiangan tibo, diukua kato nan datang.
Rundiang nan datang dari datuak, kan nan bak bungo kambang di taman, tanam bak susun bak barisan, babilai taruak daun tumbuah. Sakilek pandangan mato, rancak tak dapek dimisalkan, kagum lah sajo dek mamandang, curahan rundiang dari datuak, tak dapek kami ulang baliak, kato ba misal ba ibaraik, sananglah ati mandangakan, curahan raso dalam paham, niaik nan elok bahamparan, tajelo suto nan taurai, tautan banang jo sikoci, mamacah ragi dek bayangan, silau lah mato mamandangi.
Baseru angin dari gunuang, runduaklah buah batang ligundi, urek tajelo ka pigaran, di ari elok nan baruntuang, lah nyato buo lain tali, laweh lah asah basibiran. Ditaluak jalo bamain, di gunuang tambatan kabuik, di kampuang adaik badiri, sopan santun budi maikek, batamulah paham kasiah dalam. Nan kato iyolah bak itu, bantuak sarupo iko kini satantangan juadah nan ka tangah, umpamo pelang di lautan, sampan banamo budi aluih sarek muatan baso basi, panuah barisi ereang gendeang. Dek capek juragan dandang, capek nan indak manyalahi, dibongka sauah nan tarandam, dielo tali kakumpalan, lah takambang layia nan gadang, diliek barisan lancang muatan lah cukuik timba baliak, pasang suruik muaro tanang, bintang lah tampak ka pidoman sauah lah naiak ka kamudi, balayia malah tujuannyo.
Nan kajadi jawab dek kami, nan bak umpamo padi masak, tangkai marunduak dek buahnyo, daun basusun timba baliak, sapiah labek buahnyo boneh sukolah ati nak manuai, tapi samantang pun bak itu, bak umpamo ikan dalam ayia, samo baranang malah kito.
Cek video Pasambahan ini di Link YouTube: https://youtu.be/f7Gp8jlEwuo
