MINANGGLOBAL.ID, HERITAGE & CULTURE – Mano datuak! Disambah datuak! Adopun sambah nan ka dipasambahkan kapado datuak pado wakatu iko kini. Jikok ba siang di nan tumbuah, jikok manimbang pek nan ado, tumbuah sarupo iko kini, nan sondi andiko dalam kampuang, kan datuak nan tampuak jo tangkainyo.
Inggiran silang jo salisiah, kusuik dek datuak salasainyo, karuah dek datuak ka janiahnyo. Aluran diri badan datuak, bak umpamo kayu gadang tangah nagari, ba urek ba limbago matan, ba dahan cupak jo gantang, ba rantiang barih ba labiah, ba bungo rimbun dek adaik, ba buah kato nan bana. Buliah ba selo di urek nyo, dapek ba sanda di batangnyo, gantungan cupak nan duo, partamo cupak usoli, kaduo cupak buatan.
Nan dikatokan cupak usoli, nan sakundi-sakundinyo, nan sa pantiang tali bajak, kupang jo ameh masuak pulo, nan ganok duo baleh kayia. Ka di kikih sa abih basi, ka di basuah sa abih ayia, di anjak indak nyo mati, di bubuk indak nyo layua.
Nan dikatokan cupak buatan, nan ba tapuang kapua jo sadah, ba racik pinang jo gambia, sa ukua mako takanak, sasuai mako manjadi. Dek lah janiah cando nyo adaik, lah tarang bangun pusako, nan bak rumpuik di timpo ambun, musim pabilo lipua lai. Salangkah turun di janjang, eten di korong kampuang kami, labuah nan golong alah ba turuik, jalan nan pasa lah ba tampuah, adaik nan kewi lah bapakai, masuak ka korong kampuang datuak, lah naiak ka ateh rumah tanggo.
Kok duduak lah bakambangkan lapiak, lah talayang siriah jo pinang, lah sudah minum jo makan. Dek lah sudah minum jo makan, dek makan raso lah kanyang, kok minum raso lah pueh, limbak nan dari pado itu tuak, adok ka diri marapulai ko, nan duduak di rumah tanggo datuak, di hadapan niniak jo mamak, sarato ibu jo bapak, langko jo ipa dengan bisan, cukuik jo urang mudo matah.
Kok duduak di tangah rumah, ka jadi adaik bijo bayiak, ka tungkek pamanih jalan, ka karih pamaga adaik, dalam adaik baradaik pulo. Kok elok ratak tangannyo, panjang bao lah mangarek, singkek baoklah mauleh. Tapi samantang pun bak itu, inyo ko dek urang ketek mudo matah, umua alaun satahun jaguang, darah alun satampuak pinang, kok tadorong tuak mintak disentak, kok salah mintak disapo, tolong di tunjuak di ajari, itu nan pintak pinto kami, maklum pulang pado datuak.
Cek video Pasambahan ini di Link YouTube: https://youtu.be/GvP8oxOoPNI
