MINANGGLOBAL.ID, HERITAGE & CULTURE –
Mano datuak! Disambah datuak! Adopun sambah nan ka dipasambahkan kapado datuak, pado wakotu iko kini, kan dek nan kato alek lah tibo, limbago jamuan nan lah datang. Antah dek ari ko nan elok, antah kutiko ko nan baiak, sadang wakotu bungo kambang, ajuang balayia jo musimnyo, sauah tatagak angin tibo, imbau lah tibo bakeh datuak. Kan dek jamuan lah datang babondong, kami mananti sangaiklah suko, panuah sagalo ronggo ati. Tapi samantang pun bak itu, utang dek kami sapangkalan, manyadiokan edangan jo juadah. Kok satantangan edangan juadah, salorongan minum jo makan ko manurik adaik nan biaso, kan mamakai si rajo jonang. Dek arif si rajo jonang, tadanga piriang babunyi, eten di dalam padapuran, lalu tagak inyo sakali, lakek kupiah di kapalo, ba sisampiang tanunan aceh, bugih makasar rang namokan.
Manatiang edangan juadah, kan lah talatak di ruangan tangah, lah ta anta ka muko datuak, jawek bajawek cando piriang, jombo bajombo cawan gulai, bak umpamo fajar tabantang. Teko gadang mamacah ruang, cangkia ketek babilang tangan, heran lah mato mamandangi, umpamo ombak di lautan. Adok kapado susunannyo, di tangah awan bajombo, di tapi samuik bairiang, nago ba hoyak kiri kanan, panuah baisi sacukuiknyo. Jikok dipikia-pikia bana, jikok diinok dimanuangkan, dikana asa-muasa tantangan dek nasi nan ka tangah. Padi siranak rambun tulang, tumbuah di lereang kadataran dijamua puti linduang bulan, ari paneh jamua dilingkuik, ari ujan dikaka-kaka, masak nan indak masak amaik, masak disingai paneh patang,. Dibao jamua kakincia, eten ka ronah bungo tanjuang, iyo ka lurah sungai janiah, dicaliak candonyo kincia, ayia gadang banda batembok, bapaliang di anak roda, babunyi tingkah batingkah, bunyi alu sahut-sahutan, bak bunyi talempong jao. Padi ditumbuak tak basakam, ditampi mako badadak, diindang mako ba atah, sasukek bareh ditanak masaklah nasi sabalango, nan litak makan daulu, solo manyolo alek datang nan nasi bapantang abih.
Urang padang marantang banang
Banang dirantang diparampek
Parampek lalu dipatigo
Rundiang dirantang namuahnyo panjang
Elok dipunta nak nyo singkek
Singkek sakadar ka paguno
Talia kayia panjang sambilan
Diambiak dari ateh kapa
Ambiak ayia basuahlah tangan
Nak sanang ati sapangka
Cek video Pasambahan ini di Link YouTube: https://youtu.be/HfoVGz_iZWQ
