MINANGGLOBAL.ID, HERITAGE & CULTURE – Mano datuak! Disambah datuak! Adopun sambah nan ka dipasambahkan kapado datuak, pado wakotu iko kini, kan dek tantangan kami nan mananti. Satantangan kami nan mananti tuak, tingga di lubuak nan baliku, dipesong buyiah nan balungguak, di dakek tapian batu, ampiang ka tabiang tunggang tarah. Kok anyuik buyiah ka ilia, raso ka sampai ka muaro, tapi dek untuang ko nan malang, saketek dilendong ayia, lah ilang anyuik tak bakasan, walau di agak ka labuhan, walau dicinto ka muaro, raso ka sampai tak ka mungkin, dek tapian bana nan tak data, bago di liek pasia anyuik, nasib bak itulah kironyo. Ratoknyo sasa tak paguno, dek maso tuo nan lah tibo, baban ko tapaso kami bao, maklumlah adaik dalam budi, pusako sajak bungo kambang, raso tak mungkin disiokan. Walau ba aliah-aliah musim, walau batuka-tuka maso, nan bana bak itu juo, kewi nyo adaik nan bapakai, taguah bapacik sampai kini, tandonyo iyo nan bak itu, kato babayang bakiasan, tutua babungo dalam adaik. Tumbuah sarupo iko kini, ditembak ndak asah ka alamat, tantangan juadah nan ka tangah, umpamo pelang di lautan, sampan banamo budi aluih, sarek muatan baso basi, panuah barisi ereang gendeang. Dek capek juragan dandang, capek nan indak manyalahi, dibongka sauah nan tarandam, dielo tali ka kumpalan, lah takambang layia nan gadang, diliek barisan lancang, muatan lah cukuik timba baliak, pasang suruik muaro tanang, bintang lah nampak ka pidoman, sauah lah naiak ka kamudi, balayia malah tujuannyo. Pintak dek kami nan basamo tuak, kok lai saujuik sapangana, basamolah kito mandayuangkan.
Cek video Pasambahan ini di Link YouTube: https://youtu.be/Tadx-334hew
