MIANGGLOBAL.ID, HERITAGE & CULTURE, Sampai dek datuak. Tasirok tagamang darah, gumonta saluruh batang tubuah, bakaja darah ka muko, bakipeh paluah di dado, mandanga imbauan dari datuak. Sabab ba a lah dek baitu, kok nyo ka badan diri ambo, umpamo sampan jolong sudah, kok balayia manapi-napi, takuik jo riak jo galombang, ka pulau takuik jo buayo.
Dek baburu ka padang data
Dapeklah ruso balang kaki
Kan dek baguru kapalang aja
Nan bak bungo kambang tak jadi
Ka dijalang guru lah mati, ka dikambang buku lah kabua, baguluang bumi jo langik, baguncang lauik sailan, bakaja karang ka tapi, ambo ka karam di labuhan. Nak jan basuo nan ba itu, rundiang nan datang dari datuak, kan nan bak papatah jo patitah, papatah caro rang Minang patitih luak nan tigo, gurindam caro di Minang,
Pangkalan jo lubuak alai
Mangilang pasanyo malam
Rimbun dek datuak lah manjulai
Ambo ba cando anggang karam
Kok sasek tadorong kato, kok salah ambo manjawab, tantangan rendo nan tajombo, uraian suto nan takambang, rintiak jo ragi kok batuka, susunan banang kok tak samo.
Sabab ba a lah dek ba itu, dogak dek datuak badan ambo, singkek nyo tali nan bajalin, sayuik tu banang nan bataruah, dalam di lubuak ka ajukan. Jikok diukua patuik lah tibo, dek musim maso lah datang, tabang lah patuik ditimbali, panjang dikabuang kok tak samo, singkek dikarek nan basuo, tandonyo lubuak tak ba ikan.
Kini ko ba itu lah dek datuak, lalai jo lambek kok basuo, jan lai di ambiak ka ukuran, dek cupak pelengan adaik, tak kurang gantang nan piawai, warisan juo sajak dahulu.
Tandonyo iyo nan ba itu, tabantang jalan janjang budi, nyato tasingkok pintu raso, lah diukua kadar sasuai, dibarih buek sapaham, utang dek kito manapati. Ka di runuik ka aka budi, naraco timbangan sudah, raso tak ado cacek lai,
Lah luruih banang jalujua
Bajaik tikam basulam
Lah luruih bana dek katuju
Jo niaik elok ati di dalam
Rundiang nan datang dari datuak, rundiang taserak ka nan rapek, kato tatabua ka nan banyak, sajuak nan bukan alang-alang, bak mandi di anak sungai, bak tagak bapayuang awan, raso ditimpo kasajuak-an. Ditiliak awanyo kato, dipandang akia rundingan, kilek jo camin lah mancayo, intan jo podi bataburan, sasak tampek, lapang pikiran, kan itu nan kewi dalam adaik!
Cek video Pasambahan ini di Link YouTube: https://youtu.be/h8P_kmtGVuk
