Foto: Muhamad Fajri

Cukuik lah Uda

Samulo saumpamo pondasi nan kukuah kito diami,
Sarupo roda nan baputa, tampeknyo kabaranjak juo,
Sakijok bak cando rinai ditangah hari, paneh baganti patuih, rinai ka barubah labek.

Cukuik lah Da…
Iduik indak sarupo ransam nan samo disatiok rimbo,
Cabiak baju dapek ditumbok dijaik jo bilahan banang,
Toreh dihati tantu taruih takanang.

Dek hati talalu bagadang, talupo ma ukua tagak jo bayang.
Dek Denai sariak bana mambuek titian, ruponyo tingkujuah talalu gadang, lah lupo mambok palampuang baranang.

Di baco ka nan samulo, lah lenggang hiduik rasonyo.
Lah dapek paikek katiko lungga, panyangga nan ampiang rabah.
Tapi kini lah diraok kasadonyo, kasiak lah masuak nyiru, nan bareh alun juo tau.

Nyampang kok denai ibaraik kan Da,
Sarupo malungam ampadu, indak alang paik taraso.
Dimato.. paluang hati Uda indak denai sajo.

Ingek juolah, indak usah malabiah katiko sanang,
Jan takabua katiko lai.
Denai lah biaso jo duri nan acok malukoi.
Usah Uda gamang mancaliak lenyai nan tajadi.
Bagamang sajolah..
Jikok ka uda iko tajadi, tacucuak hiduang barayia mato,
Disinan Uda mangko maraso.

LEAVE A REPLY

Please enter your comment!
Please enter your name here