“Di ti-vi di koran, surek kaba on-li-ne kecek urang tuha sambuah berita korona. Nan himbauan harus sasuai prot.. a lah namo nyo tuha tingga himbauan se nampak dek den nyo,” kato Lobo nan baru masuak pintu kadai.
“Baru tibo lah baturo turo nyo. Aa tu?
Lah manarimo pitih lado patang? Padeh na nampak pai kecek mah,” sambuik Menan.
“Kok lado den nan Menan tanyo tantu alah, lah den agiahan lo ka rang rumah patang,”
“Ha tu apo juo lai?”
“Aden mambaco tadi, di hp anak den. Ado calon kapalo daerah mandaftar ka KPU patang koha maikua urang rami-rami. Jaleh kini korona, lai tau korona. Batambah banyak kasus buliah tau” jawek Lobo.
“Ooitu, yo manga batagang urek bana mangecek,” sambuik Mak Labay nan tibo ka kadai dek suaro gadang Lobo.
“Sabana kesal den Mak labay, sikola indak buliah. Anak den lah tambah pakak nampak, cah bali paket iyo lo. Keceknyo dak buliah barami-rami. Tapi nan apak-apak kito ko nyo hampuah mandaftar ka KPU baribu-ribu urang nan nyo baok. Den tanyo lo ka mak Labay, lai suai coitu du?” tanyo Lobo.
“Ko agak sapandek den jo Lobo mah. Tapi kok sikola nan di rumah tadi Lobo ha tagantuang awak sebagai urang gaek pulo. Kok cah bali paket bagai ha, kan ado pulo disadioan paket murah khusus baraja sajo,” kecek Mak Labay.
“Tapi Lobo masalah nan barami rami kecek Lobo tadi Iyo salah pulo mah. Sajaleh Kemendagri lah ngecek, indak buliah lobiah saratuih urang nan pai. Harus patuhi protokol kesehatan, ijan baarak-arak bakonvoi bagai. Baitu nan den baco mah Lobo,”
“Suai Mak, iyo coitu,”
“Iyo pulo mah. Sajak maota tadi den cubo pulo caliak surek kabar on-li-ne ko ha. 69 kapalo daerah petahana nan malanggar aturan nan disabuik Mak Labay tadi. Tabik berita ko Salasa patang ko baru,” tambah Menan.
“Kok ka mode ko lo kejadian kampanye suak yo parah mah. Dak ka sihaik sihaik nagari ko do. Sapu bana nan kumuah,”
“Karapai mah, dak anti selah Pilkada,” semba Lano nan baru mancogok. Tamanuang sakadai mangana kecek Lano cako. Tapikia pulo Pilkada ko ka manambah virus. Nan Mak Labay nyo bukak pulo hp android mancaliak berita tambahan kasus baru.
