MINANGGLOBAL.ID, KURENAH – “Handeeh, alah batuka tuka pemimpin nagari ko baa kok mode ko juo baru. Bak kecek rang kini ko he, Indak ado kemajuan nan signifikan tu,” kecek Yuang Lobo baturo-turo pagi di Kadai Ni Des.
“Aa tu? pagi baru ado-ado sae nan ka nyo baco,” sambuik Mak Labay nan baru tibo.
Dak baitu Ni Des, den pasan lah kopi sakarek duo. Untuak Mak Labay ciek.
“Sadang balabiah Bo?” tanyo Mak Labay.
“Bukan balabiah, dek Mak Labay lah jarang singgah di kadai nampak. Mako den traktir kopi sakarek,” jawek Lobo sambia maambuih rokok nan baru nyo salai.
“Jadi apo nan baturo-turo cako du?” tanyo Mak Labay baliak.
“Biko mak ah, lah batuka-tuka lo pemimpin nyo den. Nan nagari kito man ko jo nyo. Ko la ka Pilkada lo baliak,” jawek Lobo.
“Haa baa, ko lamak carito pagi nampak mah,” semba Menan nan lah maintai sajak tadi di kurisi lua kadai.
“Kok masalah maju nagari ko Lobo, iyo banyak nan ka dicaliak mah. Dak gedung nan nampak sajo do, pembangunan sumber daya manusia iyo pulo mah,”
“Baiko pulo Lobo, kok nak maju nagari ko tantu dicaliak sia calon ko. Lai punyo gagasan indak. Apo nan nyo karajoan kok tapiliah. Kok baitu sado nan miliah, aden raso ko Lobo e maju nagari ko mah. Jan nan maagiah pitih dipiliah Lobo,” kecek Menan sambia mintak kopi sakarek pulo.
“Iyo baitu mah. Suai kecek Menan cako,” tambah Mak Labay.
“Iyo juo mah. Baru lo tapikia dek den kecek Menan cako mak,” sambuang Lobo.
“Jadi lai Lobo bapikia, haha,”
Tabik pulo galak Ni Des mandanga jawek Menan.
“Lai jaleh Lobo, jan nan maagiah pitih dipiliah. Apolai Pilkada di maso kovik ko ha, mungkin-mungkin sajo banyak nan ka baragiah dek kampanye dak dapek barami-rami,” kecek Lano nan lah manyimak pembahasan pulo.
“Kalau dak salah den Lobo, 5 taun lalu Lobo manarimo lo solai dak. Kini Lobo sabuik lo nagari man ko ka man ko jo,” semba Lano.
“Ondeh mandeh, tadi batanyo baa nagari man ko jo. Rupo Lobo manarimo lo Pilkada patang ma yo. Cadiak bajua, ongok babali,” kecek Mak Labay tabik suga sambia manapuak meja.
“Dak bitu rang kadai, kopi duo jo Mak Labay tadi catat sajo lu. Den ka pai kaparak, maambiak lado,” kecek Lobo nan lah maansua-ansua tagak dek maraso galehnyo kanai dek Lano.
“Ha, kecek den mode yo kabana tadi. Kiro bautang pulo. Lah panuah buku dek Lobo ko rang kadai?” semba Menan. Buncah galak urang sakadai dek mandanga jawek Menan jo parangai Lobo pagi tu.
