“Sabana indak manakah, rusak namonyo tu kito sebagai masyarakat. Dek piliah mamiliah ko kapacah awak banagari? Indak masuak. Baa dek Menan tu?” kecek Mak Labay.
“Suaai mak. Angek lo tadah pado galeh. Yo andia mah,” sambuik Menan.
“Sah manang, nan jaleh apak ko sah manang. Tinggal kito dukuang,”
“Oi birungkang, sia?” kato Menan ka Lobo nan baru tibo.
“Apak ko ha, nan iko, nomor ko ha,” Lobo manunjuak gambar di layar ha-pe.
“Baa kok baitu?” tanyo Mak Labay.
Dibukaklah pembahasan dek Lobo, bacarito lah bahaso apak ko nan alah bapengalaman, apak ko nan paliang elok, indak cubo-cubo, wakilnyo mantap pulo.
“Oi, tau dari ma angku?”
“Dak paralu den jalehan, piliah selah apak ko,” tambah Lobo mangecek bahaso calon nan nyo piliah ko lah nan unggul.
“Jan sumbarang sajo, caliak bana gagasannyo. Sabalum apak ko mode ko kan urang baru pulo, mancubo-cubo pulo dulu mah. Asa mangecek jo. Raso den lah kanai pitih sahalai kapatang mah dak,”
“Indak ado den manarimo do mak hehe,” jawek Lobo.
“Tasarah angku lah manarimo atau idak. Nan jaleh jan bakalabiahan awak sebagai masarakaik. Lai jaleh! Politik ko ha den agiah tau ka ang Lobo, eloknyo sampai sudah biliak suaro senyo. Siap tu alun tantu batang iduang apak tu kamancogok ka nagari awak ko lai,”
“Ibaraik e mode si gadih jo si bujang katiko alun jadian, dak tangguang deh, jo kantuiknyo se sabaun parfum mah. Kok lah jadi beko, alah nampak parangainyo, putuih lo siap tu. jan kan mancaliak muko, nampak taranak apaknyo se amuah malangkang e mah. Jadi biaso-biaso sajolah, kok tampak buruak apak ko beko. Lai jaleh,”
“Jadih mak, patiak lah gitar menan pado meha-meha Mak Labay se nan tadanga, hehe”
“Kalegha,” kecek Mak Labay sambia malapia kuduak Lobo.
Coitulah gurau di lapau Ni Des pagi cako. Panek ota politik pai ka kovik, nan hutang batambah juo.
