Sudah sumbayang isya, lapau ni Des lah rami dek rakyat nan biasa. Cukuik, ado nan bamain koa, mambaco berita, ado lo nan batuyak tunyak dek mancaliak sinetron menangis ka menangis tun ha.
“Bus law, bus law,”
“Oto sia mak, si tengkak?” kecek Lobo ka Mak Labay.
“Yo batua juo PKI cek den tu, Pakak Ka Ikua. Indak oto do buyuang. R-U-U nan lah ketok palu. Lai jaleh?” jawek Mak Labay.
“Oh itu, yo dak jaleh dek den doh. Den pengamat cabai nyeh, haha,” sambuik Lobo manyolo.m
“Nyo a tu?”
“Kok den jalehan bana dak tamakan dek engkau do. Biko sederhananyo, Omnibus Law ko penyederhanaan dari berbagai undang-undang nan banyak tu. Tamasuak di dalamnyo masalah buruh ko, nan dikhawatirkan masyarakat kito merugikan para buruh,” mak Labay mancubo manjalehan nan nyo pahami.
“Manuruik mak baa? Dek lah demo pulo anak-anak kito mahasiswa tu,” sambuang Lano.
“Iyo ado juo kekhawatiran kito, takuik dimanfaatkan aturan ko mah. Tapi kok masalah buruh ko lah ambo caliak lo tadi ado pulo eloknyo, kito harus objektif yo. Kemudian peluang kito untuak bukak UMKM pun tambah terbuka. Manuruik hemat ambo ko eh” kecek Mak Labay.
“Ha tu anak-anak kito jo buruh nan demo baa manuruik mak?”
“Indak masalah, kan iko demokrasi. Kito buliah menyuarakan pendapat,” tambah Mak Labay.
“Tapi ada juga mak, kawan-kawan ambo di status WA nya tak mengerti. Cuma ikut posting-posting demo aja. Baa pendapat mamak?” batanyo pulo kamanakan Lobo nan tamatan S ciek di Jakarta ntun.
“Sakarek ula sakarek baluik jo baru,” kecek Lobo.
“Bia selah. Efek kota mah haha,” kecek Menan.
“Kok dek mamak ko ha, sebagai kaum intelektual seharusnyo dibaco dulu, dipahami, dibukak ruang diskusi supayo rancak. Jadi paham, jan dak amuah lo mambaco. Padahal iko kan penting koha, jan ceroboh, awak kaum inteletual. Kok alah mode tu, demo-demo lah, mamak sato manyorak lo dari balakang hehe,” sambuang Mak Labay.
“Manuruik menan baa?” semba Lobo.
“Jan aden lo ditanyo Lobo,”
“Tu apo lai?”
“Tanyo se ka rang kadai, lah bara pembukuan angku dalam minggu ko?”
Buncah galak urang sakadai, basambuang pulo dek kecek ni Des nan manyabuik catatan kadai lah ampia panuah dek Lobo sajo.
