“Antah lah antah, dak dapek nan kadisabuik lai,” meha meha Lobo sanjo cako di Lapau.
Banyak nan nyo sabuik, dari A ka Z ka A lo baliak.
Tarago Lobo baturo turo, lah masak lo goreang pisang rang kadai. Kopi itam nan dipasan Lobo tabaok pulo.
“Baa dek Ni Des tu? tapakiak sabalik cek den,” kecek Lobo mancari kawan maota. Mungkin dek lah panek lo baturo turo sorang.
“Nyo apo nan paniang tu Lobo?” bantanyo Menan nan baru maacahan ikua di kurisi lapau.
Bakato lah Lobo bahaso kamanakannyo nan di Jakarta alah wisuda. Ijazah dapek, nan kamanakannyo lah di kampuang. Sajak wisuda bulan aguih patang, alun juo dapek karajo sampai kini.
“Kok bakarajo suran se baa nyo Lobo?”
“Pado jadi anak buah urang ntah ka bilo,” sambuik Menan.
“Suai mah,” kecek Mak Labay.
“Batua mah Lobo,” kecek Ni Des pulo.
“Den agiah contoh ka Lobo, den tonton di youtube patang, indak kuliah nyo bae maekspor arang. Badarai galaknyo, jo artis bagai nan baraja kainyo ilmunyo. Kok nan diawak, anak si ida nan batanam pokaik tu, alah menghasilkan pulo. Tu si imar nan baru tamat tu, hiduiknyo dek manggaleh online. Banyak contoh lai anak si naih na manjua mi padeh. Jadi sarjana ko Lobo, jan jadi pegawai perusahaan se pikia jo jadi PNS. Bukak usaho sorang,” kecek Labay serius.
“Jadi baa ko?” tanyo Lobo nan lun juo mangarati mukasuik Labay.
“PKI tuan mah, alias pakak ka ikua,” takekeh galak saisi kadai mandanga jawek Labay.
“Mukasuik aden Lobo, cubo kreatif jo inovatif. Indak kayu janjang dikapiang indak rotan aka pun jadi. Lahan dibalakang rumah angku luweh, cubo itu manfaatkan dek kamanakan angku. Ditanam manggih kok a lah namonyo nan kaditanam. Atau cubo pelajari ilmu ekspor cek den tadi dek kamanakan angku. Kok indak manjadi reseller manggaleh online. Kamanga ka jadi pegawai tu, dapek untuang galeh lah awak punyo. Sarjana ko kan untuak marubah pola pikia awak, kan baitu,”
“Iyo pulo mah, tapi lai ka amuahnyo?”
Alun sampai kecek Lobo mancogok kamanakan Lobo mambali goreang.
“Uni, goreng pisang limah bakwan tigah,”
“Bahaso minang selah, gali pangka turiak den mandanga,” kecek Lobo nan disambuang galak urang sakadai.
“Idak buliah mode tu Lobo,” kecek Labay manesehati.
“Dak bitu do yuang, lai amuah kaparak suak?”
“Ngapain mamak?”
“Ang garap tanah di balakang tu. Tanam manggih. Modal den lai lo stek, sudah itu pai ka kiktinggi wak mancari barang nan kadigaleh, ang pakai lah. Mano tau siko lo jalan,” sambuang Lobo mayakinkan kamanakannyo.
“Haa suaai mah mamak. Mamak tolong juo dih, biar berkembang galas tu nantik,”
Ngaji di surau mulai tadanga, nan dikadai cako lah barinsuik rinsuik pulang. Tatanteng pulo dek Lobo, goreang pisang angek Ni Des dek takana bini jo anak di rumah.
